Psa 67 | Vulgate_HebPs | STEP | victori David psalmus cantici

Psalms 67

1 victori David psalmus cantici 2 exsurgat Deus et dissipentur inimici eius et fugiant qui oderunt eum a facie eius 3 sicut deficit fumus deficiant sicut tabescit cera a facie ignis pereant impii a facie Dei 4 iusti autem laetentur exultent in conspectu Dei et gaudeant in laetitia 5 cantate Deo canite nomini eius praeparate viam ascendenti per deserta in Domino nomen eius et exultate coram eo 6 patri pupillorum et defensori viduarum Deus in habitaculo sancto suo 7 Deus habitare facit solitarios in domo educit vinctos in fortitudine increduli autem habitaverunt in siccitatibus [ (Psalms 67:8) Deus cum egredereris ante populum tuum et ambulares per desertum semper ] [ (Psalms 67:9) terra commota est et caeli stillaverunt a facie tua Deus hoc est in Sinai a facie Dei Dei Israhel ] [ (Psalms 67:10) pluviam voluntariam elevasti Deus hereditatem tuam laborantem tu confortasti ] [ (Psalms 67:11) animalia tua habitaverunt in ea praeparasti in bonitate tua pauperi Deus ] [ (Psalms 67:12) Domine dabis sermonem adnuntiatricibus fortitudinis plurimae ] [ (Psalms 67:13) reges exercituum foederabuntur foederabuntur et pulchritudo domus dividet spolia ] [ (Psalms 67:14) si dormieritis inter medios terminos pinnae columbae deargentatae et posteriora eius in virore auri ] [ (Psalms 67:15) cum divideret Robustissimus reges in ea nive dealbata est in Selmon ] [ (Psalms 67:16) mons Dei mons pinguis mons excelsus mons pinguis ] [ (Psalms 67:17) quare contenditis montes excelsi adversum montem quem dilexit Deus ut habitaret in eo siquidem Dominus habitabit semper ] [ (Psalms 67:18) currus Dei innumerabilis milia abundantium Dominus in eis in Sina in sancto ] [ (Psalms 67:19) ascendisti in excelsum captivam duxisti captivitatem accepisti dona in hominibus insuper et non credentes habitare Dominum Deum ] [ (Psalms 67:20) benedictus Dominus per singulos dies portabit nos Deus salutis nostrae semper ] [ (Psalms 67:21) Deus noster Deus salutis et Domini Dei mortis egressus ] [ (Psalms 67:22) verumtamen Deus confringet capita inimicorum suorum verticem crinis ambulantis in delictis suis ] [ (Psalms 67:23) dixit Dominus de Basan convertam convertam de profundis maris ] [ (Psalms 67:24) ut calcet pes tuus in sanguine lingua canum tuorum ex inimicis a temet ipso ] [ (Psalms 67:25) viderunt itinera tua Deus itinera Dei mei regis mei in sancto ] [ (Psalms 67:26) praecesserunt cantores eos qui post tergum psallebant in medio puellarum tympanistriarum ] [ (Psalms 67:27) in ecclesiis benedicite Deo Domino de fontibus Israhel ] [ (Psalms 67:28) ibi Beniamin parvulus continens eos principes Iuda in purpura sua principes Zabulon principes Nepthali ] [ (Psalms 67:29) praecepit Deus tuus de fortitudine tua conforta Deus hoc quod operatus es nobis ] [ (Psalms 67:30) de templo tuo quod est in Hierusalem tibi offerent reges munera ] [ (Psalms 67:31) increpa bestiam calami congregatio fortium in vitulis populorum calcitrantium contra rotas argenteas disperge populos qui bella volunt ] [ (Psalms 67:32) offerant velociter ex Aegypto Aethiopia festinet dare manus Deo ] [ (Psalms 67:33) regna terrae cantate Deo canite Domino semper ] [ (Psalms 67:34) qui ascendit super caelum caeli a principio ecce dabit voci suae vocem fortitudinis ] [ (Psalms 67:35) date gloriam Deo super Israhel magnificentia eius et fortitudo eius in caelis ] [ (Psalms 67:36) terribilis Deus de sanctuario suo Deus Israhel ipse dabit fortitudinem et robur populo benedictus Deus ]